Փոքր Վեդիի խմելաջրի քայքայված համակարգը ջրամատակարար ընկերությունները փոխանցում են միմյանց. ներդրումներ կատարելու ցանկություն չունեն

Փոքր Վեդիի խմելաջրի քայքայված համակարգը ջրամատակարար ընկերությունները փոխանցում են միմյանց. ներդրումներ կատարելու ցանկություն չունեն
Փոքր Վեդի գյուղի խմելաջրի ցանցն ամբողջովին մաշված է: Գյուղացիների ասելով՝ վթարված հատվածներից ջուրն այնքան առատ է ժայթքում, որ հարակից հողամասերը կարողանում են ոռոգել դրանով: Գյուղի փողոցներն ասֆալտապատ չեն, բայց վթարված խողովակներից հոսող ջուրը շարունակաբար քանդում է գրունտային ճանապարհները: Բնակիչների ասելով՝ գրեթե ամեն օր նոր վթար է լինում, որը վերացնելը 2-3 շաբաթ է տեւում, բայց հաջորդ օրը նույն խողովակի մեկ այլ հատվածից ջուրը կարող է ժայթքել:

«Խմելաջրի ցանցը 60 տարվա վաղեմություն ունի, թեթեւակի ճնշման դեպքում վթարներ են լինում: Այս պահին էլ 3-4 վթար կա գյուղում»,- ասում է Փոքր Վեդի համայնքի ղեկավար Նորիկ Մարտիրոսյանը:

Փոքր Վեդին խմելաջրի կառավարումը 2003 թ.-ին անհատույց հանձնել է «Հայջրմուղկոյուղի» ՓԲԸ-ին: Համայնքի ղեկավարն ասում է, որ դրանից հետո էլ մեկ տասնամյակ գյուղը ջուր չի ունեցել: Ջրամատակարարումը փոքր ինչ բարելավվել է 2013 թ.-ից, օրումեջ ջուր են տվել գյուղին` մի օր Փոքր Վեդիին, մյուս օրը՝ հարեւան Լուսառատ գյուղին: «Օրական 5 ժամ ջուր էին տալիս, ընդ որում՝ 2,5 ժամ գյուղի մի հատվածին էին տալիս, 2,5 ժամ՝ մյուս հատվածին»,- պատմում է համայնքի ղեկավարը եւ ավելացնում, որ դա մեծ առաջընթաց էր, որովհետեւ բնակիչներն արդեն ջուրը չէին գնում:

Փոքր Վեդի համայնքի ղեկավարը 2013 թ.-ին գրությամբ դիմել է «Հայջրմուղկոյուղի» ՓԲԸ-ի գլխավոր տնօրեն Պատրիկ Լորենին՝ խմելաջրի խողովակները փոխելու համար: «··· ավելի քան 50 տարի, միջոցների սղության պատճառով, հնարավոր չի եղել իրականացնել, ուստի այսօր կենսական կարեւորություն եմ համարում ներքին ցանցի նորոգման հիմնարար աշխատանքների իրականացումը»,- հայտնել է նա:

«Հետագա որեւէ ներդրումային ծրագրի շրջանակներում կդիտարկվի նաեւ Փոքր Վեդի համայնքի ներքին ցանցի բարելավման հնարավորությունը»,- ի պատասխան հայտնել է Պատրիկ Լորենը: Սակայն, կառավարման հետագա 4 տարիներին էլ այդ հնարավորությունը չի ստեղծվել:

2016 թ. հոկտեմբերի 27-ի արձանագրային որոշումով Կառավարությունը 5 ընկերությունների, այդ թվում նաեւ «Հայջրմուղկոյուղի» ՓԲԸ-ի կողմից օգտագործվող ու պահպանվող ջրային համակարգերի եւ գույքի օգտագործման իրավունքը 15 տարով վարձակալության հանձնեց ֆրանսիական «Վեոլիա Օ Կոմպանի Ժեներալ Դեզ Օ» կոմանդիտային բաժնետիրական ընկերությանը:

Այդպես, 2017 թ.-ից «Վեոլիա ջուր» ՓԲԸ-ին է փոխանցվել նաեւ Փոքր Վեդու ջրային համակարգի կառավարումը: Նորիկ Մարտիրոսյանն ասում է, որ 2018 թ.-ից, «Վեոլիա ջրի» կառավարման շրջանից, գյուղն ամեն օր, առավոտից մինչեւ երեկոյան ժամ 4-6-ը ջուր ունի: «Ջրամատակարարումը բարելավվել է, բայց որակը շատ վատն է»,- նշում է համայնքի ղեկավարը:

Բնակիչները ցույց են տալիս ցեցոտված խողովակներից հոսող ժանգաջուրը, բացի այդ, վթարների հետեւանքով ջուրն աղտոտվում է եւ վտանգում մարդկանց առողջությունը: Համայնքի ղեկավարի ասելով՝ «Վեոլիա ջուր»-ն արագ չի արձագանքում վթարներին, որովհետեւ մի տեխնիկան ավելի քան 30 համայնք է սպասարկում, եւ ամեն տեղ վթարներ կան: «Այսօր անձամբ իրենց մոտ եմ եղել, բացատրել եմ, որ ջուրը շենքի հիմքն է խարխլում, բայց անօգուտ, տեխնիկա չունեն, որ արագ արձագանքեն, տեխնիկան պետք է ավելացնեն»,- ասում է համայնքի ղեկավարը:

Իհարկե, հարցի լուծումը վթարները վերացնող տեխնիկայի քանակն ավելացնելը չէ, այլ՝ փտած խողովակները փոխելը, որպեսզի բնակիչները կարողանան անխափան ու մաքուր ջուր ստանալ, նաեւ՝ ջրակորուստների համար չվճարենք բոլորս: Պրն Մարտիրոսյանն ասում է, որ գյուղի խմելաջրի ցանցը փոխելը մեծ ծախսեր չի պահանջի մատակարարից, որովհետեւ ջրաչափերը տեղադված են, խճճված ցանցավորում չունեն, ուղիղ գծով անցնող խողովակներ են, որը պարզապես պետք է փոխել:

Համայնքի ղեկավարը «Վեոլիա ջուր» ընկերության գլխավոր տնօրեն Քրիստիան ԼՖեին ուղղված գրությամբ խնդրել է օժանդակել խմելաջրի ներքին ցանցի խողովակաշարի հիմնանորոգման աշխատանքներին: «Մինչ օրս 14 222 գծամետր խողովակից վերանորոգվել է 1500 գծամետրը, իսկ նոր թաղամասերում ընդհանրապես ջրագիծ գոյություն չունի: Ամռանը գյուղի որոշ թաղամասեր ջրազրկված են լինում, եւ գյուղացիները հարկադրված ջուր են գնում: Խնդրում ենք կատարել ուսումնասիրություններ, արձանագրել վիճակը եւ հնարավորության դեպքում իրականացնել համապատասխան աշխատանքներ` համայնքում ամենօրյա ջրամատակարարում ապահովելու համար»,- հայտնել է գրությամբ:

«Վեոլիա ջուր» ՓԲԸ-ի գործառնական տնօրեն Գոռ Գրիգորյանը պատասխանել է· «Ներկայումս «Վեոլիա ջուր» ՓԲԸ-ի մասնագետների կողմից կատարվում է ընկերությանը հանձնված ջրամատակարարման համակարգի ամբողջական ուսումնասիրություն, որի ընթացքում կուսումնասիրվի նաեւ Փոքր Վեդի համայնքի ջրամատակարարման ցանցը: Անհրաժեշտության դեպքում, առաջիկա վերակառուցման ծրագրերի իրականացման փուլում Ձեր խնդրանքը հաշվի կառնվի»:

«Վեոլիա ջուր» ընկերությունից այս անորոշ, չհուսադրող պատասխանը ստանալուց հետո համայնքի ղեկավարը դիմել է վարչապետ Նիկոլ Փաշինյանին:

Be the first to comment on "Փոքր Վեդիի խմելաջրի քայքայված համակարգը ջրամատակարար ընկերությունները փոխանցում են միմյանց. ներդրումներ կատարելու ցանկություն չունեն"

Leave a comment

Your email address will not be published.


*