Եվրամիության դրամաշնորհային ծրագրերից հափշտակության գործով նիստը մեկնարկեց

Եվրամիության դրամաշնորհային ծրագրերից հափշտակության գործով նիստը մեկնարկեց
Երևան քաղաքի ընդհանուր իրավասության դատարանի Նոր Նորքի նստավայրում այսօր սկսվեց Եվրամիության դրամաշնորհային ծրագրերից խոշոր չափի հափշտակության վերաբերյալ դատավարությունը:

Քրեական գործը, հիշեցնենք, առնչվում է Քրեական օրենսգրքի 178, 38-178 և 325 հոդվածներին, այսինքն՝ հափշտակությունը, հափշտակությանն օժանդակությունը և փաստաթղթերի կեղծիքը: ԵՄ դրամաշնորհային ծրագրերից հափշտակության վերաբերյալ քրեական գործով մեղադրյալների թիվը 19 է, սակայն այս պահի դրությամբ անջատված վարույթով դատարան է ուղարկվել 14-ի վերաբերյալ գործը: Հափշտակված ընդհանուր գումարը միայն անջատված մասով կազմում է 907.281.869.7 դրամ: Քրեական գործով խափանման միջոցը որպես կալանավորում ընտրված է միայն Եվրամիության դրամաշնորհային ծրագրերի ղեկավար Մարինե Պապյանի նկատմամբ:

Այսօրվա դատական նիստին դատավոր Արման Հովհաննիսյանը ճշտեց ամբաստանյալների ինքնությունը, նրանց ծանոթացրեց իրենց իրավունքներին և պարտականություններին, քննարկվեց դատավորին ինքնաբացարկ հայտնելու հարցը: Թեև վերը նշված հարցերի քննարկմանը երկու պաշտպան ներկա չէր, դատավոր Հովհաննիսյանն այս հանգամանքը գործի նախապատրաստման մասը շարունակելու խոչընդոտ չհամարեց: Շուտով, սակայն, պարզվեց, որ ամբաստանյալներից մեկը` Անահիտ Ավագյանը, չի ստացել իր վերաբերյալ մեղադրական եզրակացությունը, ուստի դատավորը հետաձգեց նիստը:

Նշենք, որ մինչ այդ Անահիտ Ավագյանն, ինչպես նաև գործով մեկ այլ ամբաստանյալ` Արման Մկրտչյանը, միջնորդեցին իրենց ապահովել հանրային պաշտպանով, և դատարանը բավարարեց միջնորդությունները:

Ամբաստանյալների ինքնությունը ճշտելիս պարզ դարձավ, որ նրանցից մի քանիսի խնամքին տարեց ծնողներ, երկուսից ավելի անչափահաս երեխաներ կան:

Հիշեցնենք, որ ըստ «Դատալեքս» համակարգում մեղադրյալներին առաջադրված մեղադրանքի վերաբերյալ առկա տեղեկատվության` Եվրամիության դրամաշնորհային ծրագրերի ղեկավար Մարինե Պապյանը մեղադրվում է այն բանում, որ ուրիշի գույքը խարդախությամբ հափշտակելու վերաբերյալ նախնական համաձայնության է եկել մեղադրյալներ Հրայր Գյոնջյանի և Տիգրան Սուքիասյանի հետ, իսկ վերջինս իր հերթին նախնական համաձայնություն է ձեռք բերել մեղադրյալներ Ռուբինա Տեր-Մարտիրոսյանի և Արմեն Բարեղամյանի հետ, ապա վերը նշված անձինք մեղադրյալ Գևորգ Ղազարյանի օժանդակությամբ, 2012-2013 թվականների ընթացքում կեղծ փաստաթղթեր պատրաստելու և օգտագործելու եղանակով խաբեությամբ հափշտակել են ուրիշի՝ առանձնապես խոշոր չափերի գումար:

Գարիկ Չիլինգարյանն, ըստ մեղադրանքի, ուրիշի գույքը խարդախությամբ հափշտակելու շուրջ նախնական համաձայնության գալով` Տիգրան Սուքիասյանի, Հրայր Գյոնջյանի և Մարինե Պապյանի հետ` 2009-2010 թվականներին մշակել և «Ներդրումների պաշտպանության հիմնադրամ»-ի, Ինովացիոն հետազոտությունների և զարգացման կենտրոն», Նորագույն տեխնոլոգիաներ հանուն մարդկային զարգացման», «Տարածաշրջանային վերլուծությունների կենտրոն» հասարակական կազմակերպությունների անունից ՀՀ-ում Եվրոպական միության պատվիրակության գրասենյակ են ներկայացրել իրականությանը չհամապատասխանող դրամաշնորհային ծրագրեր, որից հետո հափշտակել են հատկացված դրամաշնորհային ծրագրերի առանձնապես խոշոր չափերի գումարները:

Ալեքսանդր Պողոսյանն, ըստ մեղադրանքի, նախնական համաձայնության գալով Տիգրան Սուքիասյանի, իսկ վերջինիս միջոցով՝ նաև Մարինե Պապյանի և Հրայր Գյոնջյանի հետ, 2011 թվականի ընթացքում մշակել և ՀՀ-ում Եվրոպական միության պատվիրակության գրասենյակ է ներկայացրել «Վայոց Ձորի մարզի գյուղական համայնքներում աղքատության դեմ պայքար` կաթի վերամշակման ոլորտում գյուղատնտեսական ոլորտի ակտիվ և կայուն զարգացումը խթանելու և կաթ արտադրողների և վերամշակողների համար գյուղատնտեսական արտադրանքի մատակարարումներն ու ծառայությունները հասանելի դարձնելու միջոցով» անվանումով ակնհայտ կեղծ փաստաթուղթ հանդիսացող դրամաշնորհային ծրագիր:

Այնուհետև Մարինե Պապյանը նախաձեռնել է ԵՄ պատվիրակության կողմից հայտարարված դրամաշնորհների տրամադրման մրցույթին ներկայացվող ծրագրի գաղափարի և բովանդակության մշակումը և դրա ընթացքի վերահսկումը:

Սերգեյ Բալասանյանն, ըստ մեղադրանքի, ուրիշի գույքը խարդախությամբ հափշտակելու շուրջ նախնական համաձայնության գալով Հրայր Գյոնջյանի, իսկ վերջինիս միջոցով՝ Մարինե Պապյանի հետ, Կարեն Ստեփանյանի օժանդակությամբ 2012 թվականի ընթացքում մշակել և ՀՀ-ում Եվրոպական միության պատվիրակության գրասենյակ է ներկայացրել «Պատանիների պաշտպանությունը համակարգչային աշխարհում» անվանումով ակնհայտ կեղծ փաստաթուղթ հանդիսացող դրամաշնորհային ծրագիր:

Կարեն Ստեփանյանին մեղադրանք է առաջադրվել այն բանի համար, որ նա իր գործողություններով, այն է՝ կեղծ փաստաթղթեր պատրաստելու և օգտագործելու միջոցով օժանդակել է Հրայր Գյոնջյանի և Սերգեյ Բալասանյանի կողմից խարդախությամբ առանձնապես խոշոր չափի՝ 69 մլն 301 հազար 80 դրամ հափշտակությանը:

Արմեն Միքայելյանը մեղադրվում է Տիգրան Սուքիասյանի, Հրայր Գյոնջյանի և Մարինե Պապյանի հետ նախնական համաձայնության գալով` 2013-2014 թվականների ընթացքում «Արժանապատիվ ծերություն՝ աջակցություն ծերերին իրավահավասար քաղաքացիներ և հասարակության լիիրավ անդամներ մնալու գործում» ԵՄ դրամաշնորհային ծրագրով հատկացված առանձնապես խոշոր չափի գումարների հափշտակության մեջ:

Մեղադրյալ Դինա Մանուկյանն, ըստ մեղադրանքի, նախնական համաձայնության գալով Գարիկ Չիլինգարյանի, Արմեն Բարեղամյանի, Գևորգ Ղազարյանի, Ռուբինա Տեր-Մարտիրոսյանի, Մարինե Պապյանի, Հրայր Գյոնջյանի և Տիգրան Սուքիասյանի հետ` 2009-2011 թվականների ընթացքում կեղծ փաստաթղթեր պատրաստելու և օգտագործելու եղանակով խաբեությամբ հափշտակել է ուրիշի՝ առանձնապես խոշոր չափերի 59 մլն 054 հազար 657 դրամ:

Արման Մկրտչյանը մեղադրվում է կեղծ փաստաթղթեր պատրաստելու և օգտագործելու միջոցով Մարինե Պապյանին, Հրայր Գյոնջյանին, Տիգրան Սուքիասյանին և Գարիկ Չիլինգարյանին 42 մլն 838 հազար 614 դրամի հափշտակությանն օժանդակելու մեջ:

Անահիտ Ավագյանն, ըստ մեղադրանքի, նույն անձանց կեղծ փաստաթղթեր պատրաստելու և օգտագործելու միջոցով օժանդակել է 22 մլն 770 հազար դրամ հափշտակության հարցում:

Նելլի Սեդրակյանին մեղադրանք է առաջադրվել այն բանի համար, որ նա ուրիշի գույքը խարդախությամբ հափշտակելու դիտավորությամբ, Մարինե Պապյանի օժանդակությամբ 2012-2016 թվականների ընթացքում հափշտակել է ՀՀ-ում Եվրոպական միության պատվիրակության գրասենյակի կողմից դրամաշնորհային ծրագրերով հատկացված առանձնապես խոշոր չափերի գումարներ:

Be the first to comment on "Եվրամիության դրամաշնորհային ծրագրերից հափշտակության գործով նիստը մեկնարկեց"

Leave a comment

Your email address will not be published.


*